Поплавени домови, подруми, гаражи, уништена патна инфрастуктура по вчерашното невреме во тетовските села Непроштено и Теарце. Денес се санираа штетите откако по силниот дожд поголем доток на вода од планината донел наноси од кал и песок по улиците. Жителите велат дека не паметат низ годините наназад за толку кратко време, да наврне толку многу дожд. За еден час, колку што траело невремето, улиците буквално биле претворени во реки, па за да се спречи понатамошно излевање на Непроштенска река, било извршено чистење на коритото и поставување блокади од песок, па денес една од улиците не беше проодна.
Градоначалникот на Општина Теарце, Нухи Незири, вели дека општината работи на планови за изградба на соодветна инфраструктура како би се избегнале вакви штети. Помали штети има и во Лешок, каде денес состојбата е стабилна, а до ЦУК имало дојава за поплава и во село Требош.