Кривичната постапка против бунтовниците на „Вагнер“ е затворена, објавија сите три руски новински агенции, повикувајќи се на безбедносната служба ФСБ. „Ројтерс“ го цитира руското издание РИА Новости и наведува дека случајот е отфрлен, бидејќи „учесниците ги прекинаа акциите кои биле директно насочени на извршување на злосторства“.
„Во текот на истрагата за кривичниот предмет кој на 23 јуни ја почна истражното одделение на ФСБ на Руската Федерација по член 279 од Кривичниот законик на Руската Федерација за вооружен бунт, е утврдено дека неговите учесници ги запреа активностите на 24 јуни кои беа директно насочени на извршување на кривично дело. Имајќи ги во предвид овие и други околности од значење за истрагата, истражниот орган на 27 јуни донесе решение за затворање на кривичното дело“, соопшти руската Служба за безбедност, пренесува РИА Новости.
Во саботата вечер во Ростов на Дон, штабот на Јужниот воен округ го зазеде паравоената формација „Вагнер“. Тоа се случи во сенка на изјавите на Евгениј Пригожин за наводни ракетни и бомбашки напади на Вооружениет сили на Русија врз кампови на „Вагнер“, што беше негирани од руското Министерство за одбрана и од ФСБ.
Против Пригожин беше отпочната кривична постапка за организирање на вооружен бунт. Рускиот претседател Владимир Путин за постапките на бунтовниците рече дека се злосторничка авантура, забодување на нож во грбот на Русија и предавство која довела до претерани амбиции и лични интереси.
Белорускиот претседател Александар Лукашенко, во договор со Путин, разговараше со Пригожин, кој го прифатил неговиот предлог за запирање на движењето во Русија и да се преземат натамошни чекори за деескалација. Портпаролот на Кремљ, Дмитриј Песков подоцна изјави дека Пригожин ќе замине во Белорусија, а кривичната постапка ќе биде повлечена, а како гаранција за тоа го наведе дадениот збор на Путин.