Поради подобрувањето на временските услови полека се стабилизира водостојот на реките кои во некои критични места се излеаа и предизвикаа поголем број поплави.
Тетовското село Раотинце се опоравува од надојдениот Вардар. Според информациите од ЦУК во селото поплавени се неколку подрумски простории, повеќе дворови и обработливо земјиште. Во текот на вчерашниот ден беше забележано минимално повлекување на нивото на водата од 10 до 15 сантиметри.
Во Брегалничкиот регион се излеа Кочанска река и ги поплави земјоделските површини, како и куќи и дворови во Облешево.
Нивото на водата во Калиманци, како и во реките Пчиња и Крива река се стабилизира.
Од ЦУК јавуваат и за прекин на сообраќајот на патот Извор- Прилеп поради наноси од земја. За ова како што соопштуваат известени се ЈП за одржување и заштита на магистрални и регионални патишта од каде соопштија дека денеска ќе излезат на терен за санирање на состојбата.