Еден месец затворен сообраќаен крвоток. Мостот „Беласица“ е надвор од функција. Најкраток рок за негово пуштање во употреба е еден месец, а тоа да се случи потребно е ЕСМ веднаш да ги отстрани цевките за топлификација за да може да се работи на санација на мостот, тврди сеизмологот Михаил Гаревски.
Од ЕСМ, пак, уверуваат дека ќе направат напори во најкраток можен рок да заврши отстранувањето на опожарениот топловод.
„Почетокот на активностите за санација на опожарениот топловод е поврзан со завршување на сите дејствија и проверки на состојбата на мостот од страна на вклучените релевантни институции и компании. ЕСМ Дистрибуција на топлина ќе вложи максимални напори отстранувањето на опожарениот топловод на мостот да се заврши во најкраток можен рок“, велат од ЕСМ.
Градоначалничката Арсовска денеска одби да даде изјава. Пред два дена во телевизиско гостување најави дека за една недела мостот „Беласица“ ќе биде пуштен во употреба. Сеизмологот Гаревски контра Арсовска, мостот не е безбеден за сообраќај.
Пред повеќе од месец дена мостот „Беласица“ го зафати пожар, а тогаш градоначалничката Арсовска обвини за саботажа и тврдеше дека некој намерно го потпалил. Експертизата и испитувањата се завршени и се чека официјално извештајот да стигне до градот Скопје за да се почне со санација на мостот „Беласица“.
Симона Петровска