САД очекуваат Приштина и Белград да преземат итни чекори за деескалација на тензиите и да го следат планот од три точки претставен од Европската унија, изјави портпаролот на Стејт департментот Метју Милер.
Според него, како дел од ова, Приштина мора да обезбеди градоначалниците Албанци да ги извршуваат своите преодни должности од алтернативни локации, како и да ги повлече полициските сили од север.
Стејт департментот очекува и „безусловно ослободување на тројцата косовски полицајци уапсени од Србија“.
„Сметаме дека и Косово и Србија мора да го следат планот од три точки претставен од ЕУ“, рече Милер.
Стејт департментот ја повтори својата осуда за „насилството врз војниците на КФОР предводени од НАТО, агенциите за спроведување на законот и новинарите“.
Најавено е и дека САД во моментов не сакаат да зборуваат за можни санкции и дека фокусот е на страните да преземат чекори за деескалација на тензиите.
„Остануваме ангажирани од двете страни, како и со партнерите во регионот. Државниот секретар Ентони Блинкен разговараше со партнерите во регионот, а исто така и советникот Дерек Шол, како и други“, рече Милер.