Војната во украина, заедно со конфликтите на други места и климатските промени, направија повеќе луѓе од кога било порано, да бидат раселени од своите домови минатата година, зголемувајќи ја нужноста за итна, колективна акција за ублажување на причините и влијанието на раселувањето, соопшти денеска УНХЦР, агенција за бегалци на Обединетите Нации (ОН).
Водечкиот годишен извештај на УНХЦР, глобални трендови во присилното раселување за 2022 година, покажа дека до крајот на 2022 година, бројот на лица раселени поради војна, прогон, насилство и прекршувањата на човековите права изнесува рекордни 108,4 милиони, што е за 19 милиони повеќе во однос на претходната година и е најголем пораст досега.
Растечкиот тренд на глобалното принудно раселување не покажа знаци на забавување годинава, бидејќи распламтување на конфликтот во Судан предизвика нови раселувања, а со тоа глобалниот вкупен број се искачи на проценети 110 милиони до мај.
Од вкупниот број, 35,3 милиони беа луѓе кои минале меѓународна граница за да најдат безбедност, додека поголем дел – 58 отсто, односно над 62 милиони луѓе беа раселени во нивните матични земји поради конфликти и насилство, соопшти УНХЦР.