Албанскиот премиер Еди Рама синоќа соопшти дека средбата меѓу владите на Албанија и Косово планирана за денеска е откажана, бидејќи нема договор со косовскиот премиер Албин Курти, а земјата оди кон санкции од меѓународната заедница.
Според Рама Косово е во ситуација на заострување на односите со целата евроатлантска заедница.
Тој информира и дека побарал од Курти денеска да се сретнат во потесен формат и да разговараат за ситуацијата но дека за ваквото негово барање не бил постигнат договор.
Албанскиот премиер дообјасни и дека средбата меѓу двете влади не е можна бидејќи Косово оди кон санкции и дека неговата земја е целосно против начинот на кој сега дејствува косовската влада.
И портпаролот на ЕУ, Петер Стано, потврди дека кабинетот на шефот на европската дипломатија споделил со земјите-членки на ЕУ нацрт мерки што треба да се преземат доколку премиерот Курти не преземе соодветни и итни чекори за деескалација на ситуацијата и намалување на тензиите.