Кошаркарската ѕвезда на Далас Маверикс, Словенецот Лука Дончич се понуди да ги плати трошоците за погребот на осумте деца и чуварот кои загинаа во масовното пукање во средата во Белград. Веста најпрво ја пренесе угледниот „И-ЕС-Пи-Ен“ (ESPN), повикувајќи се на портпаролот на Фондацијата „Лука Дончич“, за подоцна да ја потврди и самиот кошаркар на Твитер.
Дончич е во голема мера поврзан со Србија. Неговиот татко Саша е по потекло од Србија, а роден е во Словенија, како и Лука. Таму има и членови на фамилијата, како баба, тетки и многубројни роднини.
„Срцето ми е скршено по трагедијата во Србија и загубените животи на недолжни деца. Моите мисли се со семејствата на жртвите и целото општество кое е погодено од трагедијата“, изјави Дончич.
Две деца од повредените во основното училиште „Владислав Рибникар“ во Белград денеска се пуштени на домашно лекување. Состојбата се подобрува и кај дел од пациентите кои се хоспитализирани на Детската клиника и во Ургентниот центар во српската престолнина, но кај дел останува и натаму критична.
Веднаш беше уапсено 13-годишното момче кое го изврши крвавиот пир, како и неговите родители.