Стравот од губење на моќта и влијанието на црквата врз своите верници, а особено од женскиот пол, е во основа на реакциите на дел од свештенството против моделот на модерна жена, оценува претседателката на Реактор – Истражување во акција, Тања Иванова, во вечерашната Топ Тема на Телма.
Мислам дека има повеќе нивоа на овој страв и овие реакции, и една од клучните работи во основа на борбата против родовата еднаквост, значи борбата против борците за човекови права, во основа е стравот, или незнаењето и погрешната информираност. Затоа што многу од ставовите кои што ги искажа владиката, и претходно неговиот колега, немаат никаква допирна точка со она што реално се случува на поле на барање на родова еднаквост, рече Иванова.
Додава дека причината за ваквите реакции од страна на Црквата можеби е објавувањето на предлог законот за родова енаквост кој се подготвува.
Ова е еден чекор кој што е подолготраен, законот инаку се подготвува уште од 2019 година, ние сме дел од работната група сиве овие години, и имало и претходни верзии на закон, меѓутоа зошто токму сега, и зошто токму таа реакција, искрено како човек, без истражување би рекла дека можеби некој сака да купи политички поени во целата оваа приказна. Бидејќи знаеме дека популизмот најлесно носи гласови а живееме сепак во држава во која што имаме огромен број на луѓе кои што практикуваат религија и можат да бидат во наводници купени, рече Иванова.