Додека надлежните „Водовод“ и Град Скопје молчат, министерката за животна средина радосно најавува дека за најмногу два месеца ќе почне изградбата на скопската пречистителна станица во атарот на Трубарево. Како што веќе објави Телма, проектот од околу 200 милиони евра од кредити и грантови ќе го работат германската компанија ВТЕ и домашната „Жикол“ кои на тендерот го победиле турскиот конкурент „Кузул“.
Но, договорот се држи во тајност, а градските власти не објавија, ниту како ќе се гради, ниту кога треба да биде завршена станицата, ниту како ќе се контролира изградбата. Ниту денеска директорот на „Водовод“, Драган Илиевски не одговори на нашите повици, а нема ниту одговор од градот. Министерката Шукова вели дека имало определени потешкотии поради што тендерот се одложил.
Поради тендерот, се распадна скопската коалиција на градоначалничката Данела Арсовска и ВМРО-ДПМНЕ, кога Арсовска ја обвини партијата и Мицкоски за ставање на рачиња во медот. На крај на тендерот, сепак, победи германската фирма, иако неофицијално градоначалничката сакаше победа на турската. Станицата ќе ги пречистува отпадните води од главниот град, а корист ќе имаат над половина милион граѓани.
Тамара Марковска