Стручната јавност остро го осуди анестезиологот од тетовската болница. По Лекарската комора од каде што покренаа постапка за одземање на лиценцата на 43-годишниот лекар, пристигнуваат и индивидуални осуди од колеги и од фелата. Прекршени се етички норми, закони, начела во медицината и затоа прво казна, а потоа и превенција – вака професорот Стојан Бајрактаров од Клиниката за психијатрија го коментира скандалот.
„Според мене, во овој случај има прекршување на етички норми, на закони, има прекршување на законите за права на пациентите, за информации, така што тоа сигурно е еден показател за целото општество и негативното влијание на социјалните мрежи. Не знам кој би го оправдал тоа. Такво нешто е за крајна осуда и најпрво треба да биде санкционирано, а потоа и да не биде повеќе дозволиво“, изјави проф. д-р Стојан Бајрактаров, директор на Универзитетската клиника за психијатрија.
Социјалните мрежи се интересен феномен и со себе носат бројни придобивки, но и ризици. Според комуниколозите, морето од содржини е тешко да се исфилтрира. Но, овој скандал со снимање на пациентки на одделението за гинекологија додека примаат лекарска нега, може да помогне за да се спречат ваквите појави во иднина.
„Ваквите проблесоци или поединци коишто прават негативни работи ги имало и ќе ги има. Предноста во дигиталниот свет е што сега можеме да ги видиме, да ги спречиме од понатамошни негативни дејствија и да превенираме други луѓе да го направат тоа. Инаку, желбата да се биде популарна личност постоела отсекогаш, но денес социјалните медиуми ја нудат многу брзо. Ние не треба да дозволиме, а тоа зависи од институциите, такво нешто да стане пракса во негативната смисла на зборот. Попрво, треба да ги промовираме младите луѓе и нивните постапки коишто се во изобилие“, изјави комуникологот Бојан Кордалов.
Тетовското обвинителство го товари за кривичните дела: несовесно постапување во службата и неовластено снимање, тетовскиот суд му одреди притвор, а Судот на честа при Лекарската комора ќе одлучува на колку време ќе му биде одземена лиценцата. Анестезиологот може и трајно да остане без неа, ако има судска пресуда против него.
Петар Догов