Мислам дека на сите ни е јасно оти клучот за продолжување и напредок во дијалогот меѓу Белград и Приштина е спроведување на обврските што косовската страна ги презеде уште од пред 10 години со Бриселскиот договор и што се однесуваат на формирањето на заедницата на српски општини, изјави денеска српската министерка за евроинтеграции Тања Мишчевиќ.
По договорот од Охрид, како што можевте да видите, на почетокот на оваа недела во Брисел се организираше и состанок на двата технички преговарачи во овој процес и резултатот на тоа е Декларацијата за исчезнатите и по првпат разговор за заедница на српски општини, изјави Мишчевиќ на заедничката прес-конференција со вицепремиерот за европски прашања Бојан Маричиќ во Скопје.
Таа нагласи дека Србија е свесна за обврските кои произлегуваат од она што сега се нарекува „европски предлог“, а порано беше познат како „француско-германски предлог“ и од анексот за имплементација.
Според она што го знаеме тоа ќе стане дел од нашето специфично поглавје 35, кое што всушност и досега беше инструмент за следење на спроведувањето на сето она што низ процесот на дијалог е направено. Србија е многу јасна дека ги спроведува обврските што ќе ги преземе, но другата страна исто така мора да покаже дека е подготвена да ги спроведува своите обврски, додаде Мишчевиќ.