Германската министерка за надворешни работи, Аналена Бербок не го убедила Христијан Мицкоски дека ВМРО-ДПМНЕ треба да поддржи уставни измени. На вчерашната средба во германската резиденција која траела 40-тина минути, опозицискиот лидер рекол дека има свој план за надминување на кризата во земјава. Започнува со предвремени избори, а по нив ќе им биде претставен и на дипломатите.
Мицкоски вели дека последните две недели имал многу состаноци и дека трпи жестоки притисоци кои веројатно ќе продолжат. Тврди дека тој лично нема да се помести ниту милиметар, а во партијата овој пат нема слаби алки.
„Мицкоски е заложник на Левица и оттаму потребата да глуми радикал и да се натпреварува со блокади и деструкции за попречување на европскиот пат“, реагираше СДСМ.
Владеачката партија ја обвини опозициската дека прави сè за да ја загрози европската иднина, пласира лажни вести со кои ја манипулира и вознемирува јавноста кога треба да се интензивира европскиот процес. Премиерот Ковачевски изминативе денови неколку пати ја повика ВМРО-ДПМНЕ на постигнување општествен консензус во реализацијата на стратешката цел – влез во ЕУ.
Вчера, германската министерка Бербок се придружи на дипломатските повици сите демократски партии да се обединат околу европската иднина на земјата. Потсети дека ЕУ и Македонија имаат преговарачка рамка и побара уставните измени да не станат јаболко на раздорот меѓу партиите и тема за собирање политички поени.
Соња Николовска