Под превезот на транспарентност, а како жртва на вешти хакери – ФЗО сега е појдовна точка за исправање на пропустите и недоследностите во компјутерските мрежи и системите на сите институции. Проблемот со хакерскиот напад на Фондот се уште е актуелен, а бројните прашања и дилеми кои се отворија со тоа утре ќе бидат разгледувани на владина седница. Сега не е прашање на избор туку станува збор за наредба. Вицепремиерката за добро владеење Грковска, во име на Владата испорача неодложно барање до институциите да инвестираат во сајбер-заштита, затоа што тоа не е луксуз.
- На утрешната седница на Влада предлагаме информација со точки и задолжувања кои сите институции сега ќе мора неодложно да ги направат за да можат да ја подигнат сајбер-заштитата на нивните институции, изјави Славица Грковска – Вицепремиер задолжен за политики за добро владеење
Надлежните сега уверуваат дека податоците од Фондот за здравствено осигурување се спасени, но останува да виси прашањето за одговорноста и вината во целата ситуација – зошто се дозволи да дојде до тоа и какви се сегашните, постоечки начини на одржување на најважните системи.
- Ако имате бекап – вратете оттаму. Ако немате, е тогаш работата станува многу покомплицирана. Едната опција е да им платите на криминалците и тие ќе испорачаат клуч. Но, никој не гарантира дека тој клуч совршено добро ќе ги декрпитира податоците. Дури е сосема можно да тој криптовирус е напишан да шифрира податоци, но едноставно некој да не бил толку внимателен во делот на програмата којашто ги дешифрира податоците, па да направи грешки. И тоа е ризик. Може и да платите пари, а хакерот да ви прати ѓубре – и тоа се случува, вели Божидар Спировски – ИТ Инженер
Претходно премиерот Ковачевски во своја изјава потврди дека станува збор за т.н.„ Рансомвер“ – малициозен софтвер кој ги собрал податоците од Фондот. Хакерите барале откуп за ослободување на системот и негово враќање во функција. А, шпекулациите беа откупот го побарале во биткоини, но од МВР не дадоа потврда за такво нешто.
Петар Догов