На никој не би му посакал на ваков начин да ги остварува своите права за работа и лек на социјалните мрежи и медиумите, уште колку време треба да чекам за лекот „Трикафта“ и за пристојно работно место, јавно, преку Фејсбук, Игор Пехчевски, лице заболено од цистична фиброза, упати прашање до премиерот Димитар Ковачевски и претседателот Стево Пендаровски.
Им порача да постапат за неговиот случај како да постапуваат за свое дете. Премиерот Ковачевски, пак, вчера изјави дека Министерството за здравство и Фондот за здравство заедно со клиниките што се задолжени за пациентитите со цистична фиброза – Клиниката за пулмологија и Клиниката за детски болести веќе работат со потенцијални добавувачи.
Со патните трошоци на пратениците може да се купи „Трикафта“ за 14-месечна терапија на еден болен од цистична фиброза
Терапијата со „Трикафта“ на годишно ниво за еден пациент чини 311.200 американски долари, односно 300.000 евра. Но, при директни преговори со единствениот производител кој го има патентирано лекот, владата се надева дека може да се постигне пониска цена. Но, откако беше објавена информацијата дека лани пратениците, за дополнителни патни трошоци наплатиле од собранискиот буџет наполнет со пари од граѓаните, 360.000 евра, лесно може да се направи пресметката за лекот.
Доколку тие пари што ги зеле пратениците за патни трошоци се потрошиле за „Трикафта“ тогаш можело да се купи терапија за 14 месеци и 12 дена за еден пациент од цистична фиброза, како што беше и случајот со сега веќе починатиот Благојче. Од друга страна, пациентите од цистична фиброза и натаму бараат помош за брза набавка на современата терапија која ги лекува, а не како сегашната терапија која ја добиваат и којашто, како што велат, им овозможува да преживеат и да лежат со недели во болница. Последните информации од Малмед се дека сè уште не е доставено барање за одобрување за увоз на лекот во земјава.