Од Асоцијацијата на приредувачи на игри на среќа реагираат на вчерашната одлука на владата да се донесе закон со кој кладилниците не смеат да се отвораат на 500 метри од училиштата. Тврдат дека со овој предлог закон ќе се затвори бизнисот, а 10 илјади луѓе ќе останат без работа, со што буџетот ќе осиромаши за 280 милиони евра на годишно ниво.
Предлогот за дислокација на објектите каде се организираат игри на среќа е многу тешко изводлив на терен. Согласно постоечката урбанизација, дистанцирање на одреден објект на 500 метри од едно училиште, ќе го приближи истиот објект на помалку од 500 метри до друго училиште. Затоа, одговорно тврдиме дека предложената дистанца од 500 метри во својата суштина значи дека Владата всушност предлага целосно затворање на оваа економска гранка. Ќе се затвори 100% законски бизнис што автоматски ќе предизвика игри на среќа да се играат на црно, во подруми, како децении наназад. Државата ќе нема ниту контрола, ниту ќе остварува буџетски приливи. Приходите од играње во диви играчници ќе завршуваат во приватни џебови, без да се плаќаат лиценци и даноци, велат од АПИС.