Без решенија за економско енергетската криза поради што граѓаните тонат во сиромаштија, рекордна инфлација и злоупотреби на системот за да се украдат што е можно повеќе пари. Ова се дел од обвинувањата кои претседателот на ВМРО-ДПМНЕ, Христијан Мицкоски денеска ги упати кон владеачката коалиција во своето обраќање пред партиските членови. Тој побара техничка Влада која би организирала предвремени избори на пролет и заедничка платформа на сите политички партии и општествени чинители.
Според Мицкоски, СДСМ е во сервилна и подредена положба кон ДУИ, а на двете партии, според него, единствен приоритет им е личното богатење.
Тој го обвини лидерот на ДУИ, Али Ахмети дека нема ништо заедничко со европските вредности за кои тој говори и дека му се флоскула за да не понесе одговорност за трагедии каде директно се инволвирани или виновни членови на ДУИ, како „Беса транс“ и Модуларната болница во Тетово.
За Мицкоски единствено решение се предвремени избори, лидерските средби досега одржани биле крајно неконструктивни и потребна е заденичка политичка платформа за спас на државата.
Владеачката гарнитура ја обвини за лоша дипломатија и низа порази, но и за кампања против него за навода блискост до Бугарија и Ванчо Михајлов.
Во своето обраќање нагласи дека промена на Уставот нема да има.
Мицкоски најави дека во моментот кога ќе има промена на власта, ВМРО-ДПМНЕ ќе направи темелна проверка на потеклото на имотот на актуелни функционери, не само на оние кои се објавени во рамките на аферата „паразити“ и доколку се утврдат злоупотреби имотите и средствата ќе се запленуваат и ќе има кривична одговорност.
Огнен Чанчаревиќ