На прагот на тешката зима и среде светска криза, се кројат планови како ќе се контролира што се увезува од енергенси и како се употребува.
Јавноста знае дека ќе мора да се горат и материи коишто емитираат многу поголеми количества на токсични честички во воздухот. Ова досега е многупати кажано, а тоа што сè уште е нејасно е како да се зачува здравјето на луѓето и како да се намали загадувањето на воздухот колку што дозволуваат приликите.
Од Министерството за животна средина најавуваат меѓуресорска координација и инспекции.
„Ние како Министерство секогаш ќе бараме да се почитуваат стандардите. Ќе соработуваме заедно со инспекторатите и со Министерството за економија, ќе бараме и од Државниот инспекторат за животна средина да соработува. Сите сме свесни дека за жал ние ќе употребиме мазут и јаглен за да произведеме струја. Тоа за жал е состојбата во цела Европа. Ова не е криза во нашата држава туку во целата Европа. Само за информација и во Германија ќе почнат да употребуваат јаглен“ изјави Насер Нуредини, министер за животна средина и просторно планирање.
Поранешната директорка на Државниот инспекторат за животна средина, Ана Петровска, смета дека во Скопје најголем проблем би претставувало доколку топланите Исток и Запад наместо на природен гас, за греење на домаќинствата и институциите би користеле мазут.
Го коментира оперативниот план за работа, а таму за овие топлани е предвидено граничните емисии на сулфурен диоксид доколку се користи гас да изнесуваат 35 милиграми н-метри кубни. Доколку се гори мазут, оваа гранична вредност за топлана Исток е 1700 млиграми н-метри кубни.
„Оној момент кога се прејдени на гас, престанат е процесот на инвестирање во системи за пречистување на отпадните гасови. Тука е запрен и процесот на издавање на А-интегрираната дозвола. Тие не можеле да добијат А-интегрирана дозвола затоа што немаат филтри, доколку би користеле мазут. Значи, тие со гасот ги постигнуваат граничните вредности, а доколку користат мазут не можат никако да ги постигнат овие гранични вредности за коишто велам дека се многукратно повисоки од оние гранични вредности коишто се предвидени за гас и тука никаква инспекциска контрола нема да помогне“ изјави Ана Петровска, поранешен директор на Државниот инспекторат за животна средина.
До граѓаните главно ќе се испраќаат апели, велат од ресорот Животна средина, затоа што не сакаат да казнуваат во тешки економски времиња.
Свесен дека тоа често може да биде случај и одредени категории на луѓе да користат буквално што ќе стигнат – министерот Нуредини коментира дека тие треба да знаат дека отровните честички најпрво штетат на нивното здравје и на најблиските.
Петар Догов