Без активности на терен една година откако Шар Планина е прогласена за заштитено подрачје. Досега биле направени само подготовки, за денес Нацрт- планот за управување со Националниот парк да биде ставен на јавна расправа. Со него се предвидува, покрај досегашниот 1 вработен, односно директорот на Установата, да бидат ангажирани 15 лица, вклучително и ренџери. Од идната недела ќе бидат отворени и канцеларии.
Надлежните свесни дека се доцни, но велат дека било потребно време.
Првпат од 1956 година ние да креираме национален парк и ние сите заедно ја учиме процедурата. Важно е да биде успешен на крај, иако доцниме малку, но тоа не значи дека немаме активности, директорот и екипата нон стоп се на терен. Утре ќе имаме еден план, денеска дебатираме за тоа, сите да бидеме задоволни, и граѓаните и приватниот сектор и да ја заштитиме Шара, изјави министерот за животна средина и просторно планирање, Насер Нуредини.
Очекуваме сега брзо и канцелариите да ги добиеме, ренџерската служба и другите вработени, секако верувам за брзо време и тие ќе бидат на терен, очекуваме добра соработка со граѓаните и со резидентните во Националниот парк, тие се најдобрите чувари на Шар Планина, рече Ибрахим Дехари, в.д. директор на ЈУ Национален парк „Шар Планина“.
Планираните велат дека Шар Планина е во најлоша состојба досега. Продолжува дивата сеча, градењето дивоградби, хидроцентрали и отворањето патишта. Паркот ќе има поддршка од нив, но потребно е сите институции да бидат вклучени.
Огромен реон имаме на Шара, за да се покрие треба минимум 80 ренџери, повеќе од 20 возила, кои ќе гледаат како се работи, инфо центри и сл. Свесни треба да бидеме сите, да дадеме поддршка на Националниот парк, да ги притискаме другите институции да бидат насочени кон заштитата и побрзо да се реализира вработување и се што треба друго за да може побрзо да функционира, вели Јован Божиновски од платформата „пријатели на шара“.
Националниот парк Шар Планина зафаќа површина од 62 705 ха, а идниот економски развој и заштитата на природните вредности се дефинирани во 4 зони на заштита.
Данијела Бибилоска