Техничкиот министер за внатрешни работи пред изборите 2020-тата и поранешен директор на Агенцијата за разузнавање Наќе Чулев објави статус на ФБ на кој наведува дека веќе не е дел од безбедносниот систем на државата за што ја обвини актуелната власт.
=По повеќе од 25 години поминати во служба на татковината и граѓаните на Македонија, не по моја вина, на мое жалење повеќе не сум дел од безбедносниот систем. Тоа што за сите нас е патриотизам и љубов кон татковината, оваа предавничка власт сега го стигматизира како македонски екстремизам и радикализам, а македонските патриоти, преку креирање на перфиден систем на лажни и фабрикувани информации континуирано ги елиминира од безбедносниот систем. На тој начин, смислено и со план ги ослабнуваат капацитетите на државата и ја доведуваат во подредена положба, напиша Чулев.
Тој рече дека сите кадри продолжуваат со работат во интерес на Македонија, а наведе и дел од своите постигнувања во кариерата.
-Јас сум човек – професионалец кој својата кариера ја градел чекор по чекор, почнувајќи од најниското скалило во службата. Сите овие години бев во првите редови на одбраната на уставниот поредок, територијалниот суверенитет и интегритет и безбедноста и интересите на Македонија. Ја сакам државата и придонесував за неа. Учествував и во многу операции за поддршка на меѓународната безбедност за што имам добиено награди и признанија како од неколку поранешни директори на матичната институција и претседателот на државата, така и од меѓународни партнери, порача Чулев.
Чулев во време на претседателските мандати на Ѓорге Иванов беше директор на Агенцијата за разузнавање каде беше вработен, а остана во институцијата и после завршувањето на директорскиот мандат.
Телма упати прашања до Агенцијата за тврдењата на Чулев, но не добивме повратен одговор до објавувањето на информацијата.
Претходно, Чулев неколкупати беше санкциониран поради фејсбук статуси поврзани со состојби во МВР за време на неговиот мандат. За време на протестите против францускиот предлог одржа и прес конеференција во седиштето на ВМРО-ДПМНЕ. Исто така објави и повеќе фотографии за учество на протестите пред владата.