Битолската коњаница „Галоп“ од пред Офицерски дом во Битола го почна седумдневното патување до Крушево каде на Илинден ќе учествува на манифестациите во тој град.
Ѓорги Стојчевски, одговорен водач на коњаницата и претседател на Здружение за рурален развој и организирање на битолска коњаница „Галоп“-Битола, истакна дека во коњаницата учествуваат 12 момчиња и две девојки кои со своите коњи ќе одјаваат пат долг 174 километри, почнувајќи од Офицерски дом, а вечер ќе преноќат во селото Цапари.
За овој предизвик се подготвувале шест месеци, од месец јануари до денес.Подготовките биле тешки, но тие лично ги подоготвувале коњите и самите себе со кондиција.
На патот до Крушево се и две девојки Симона и Ивана кои изразија желба да се вклучат во одбележувањето на Илинден и да се оддаде почит на илинденците кои го дале животот за Македонија, истакна Стојчевски и потсети дека само во битолското село Цапари биле евидентирани 94 илинденци.
Според планот, битолската коњаница во Крушево треба да пристигне на 31 јули, на 1 август ќе учествуваат на дефиле во Крушево, а на 2 август на Мечкин Камен ќе го одбележат државниот празник Илинден.