Во некои градови, како Битола, речиси и да нема интерес за оваа форма на згрижување. Министерството за труд и социјала и СОС детско село, отпочнаа кампања со цел да се подигне јавната свест за потребата од згрижување на деца и да се зголеми бројот на потенцијални згрижувачи.
Митра Ристевска од Битола веќе 15 години одгледува дете кое останало без родителска грижа. Во нејзиниот дом е од најрана возраст, сега е средношколец. Митра вели дека кај мајката згрижувач нема разлика дали го родила или само го одгледува детето. Вели и љубовта и тагата и радоста се исти за сите деца во семејството.
- Што значи згрижувач? Тоа си пред да го земеш детето, потоа е исто како да си го родила. Го сакаш и повќе од тоа, затоа што знаеш дека на детето му треба помош и многу љубов. На сите деца им поскаувам да најдат семејство, да се згрижат, да бидат сакани, среќени и весели во семејствата, вели Митра Ристевска, згрижувач од Битола.
Во Битола има само 4 згрижувачки семејства, интересот е исклучително мал во споредба со соседните општини, каде бројот на вакви згрижувачи е над 30.
- На овие деца потребно им е семејство, потребен им е топол дом каде тие ќе растат. Згрижувачите се нашите херои, а битолчани се познати по својата хуманост, а хуманоста можат да ја изразат на овој начин, да згрижуваат повеќе деца, рече Лидија Ѓоршевска, директор на Центар за социјална работа Битола.
Министерството за труд и социјала, заедно со СОС Детско село, отпочнаа кампања за поттикнување на хуманоста за згрижување деца и зголемување на бројот на потенцијални згрижувачи под мотото „Подај рака промени живот стани згрижувач.
- Се надеваме дека преку оваа кампања која е само почеток на нашите напори да се доближи идејата за згрижување и ќе се зголеми бројот на згрижувачки семејства и во Битола. рече Јасминка Кочовска од Центарот за поддршка на згрижувачки семејства во Битола.
Во државата има околу 350 згрижувачи семејства кои се грижат за 600 деца, но потребата е многу поголема. Згрижувачите за едно дете добиваат надомест над 16 илјади, а за дете со попречност околу 20 илјади. Оваа сума се зголемува за згрижување на две и повеќе деца.
Емилија Мисирлиевска