Тече притворот од 8 дена што му го одреди судија на претходна постапка на Ламбе Алабаковски за подметнатот пожар во културниот ценатар Ванчо Михајлов во Битола. Познатиот поп пејач по изречената мерка доцна синоќа е пренесен во притворското одделение на битолскиот затвор.
Обвинителството поведе постапка за кривичното дело. Предизвикување општа опасност и побара притвор поради основано сомнение Алабаковски да се даде во бегство затоа што има двојно државјанство, македонско и американско.
Од полицијата вчера соопштија дека 34 годишниот пејач го признал делото. Настанот се случи во саботата утрото, кога Алабаковски истурил шише бензин пред влезот на културниот ценатр Ванчо Михајлов, ставил фитил и го запалил, при што изгоре влезната врата.
Тој е уапсен три дена по инцидентот, а при претрес во неговиот дом е пронајдена и одземена облеката со која го изврши делото и велосипедот со кој дојде на местото. За кривичното дело Предизвикување општа опасност му се заканува затворска казна од 6 месеци до 5 години.
Вечерва во Битола најавен е протест за поддршка на притворениот пејач.
Емилија Мисирлиевска