Засадена марихуана полицијата открила во нива во реонот помеѓу тетовско Нераште и скопска Радуша, од левата страна на реката Вардар.
На оваа локација имало 100 стебла-насади “канабис сатива”, дел засадени во земја, а дел во саксии.
На местото вчеравечер биле затекнати тројца скопјани осомничени за делото, кои се приведени, по што ќе им биде изготвен соодветен поднесок за “неовластено производство и пуштање во промет на нартотични дроги, психотропни супстанци и прекурсори”, со кој денеска ќе бидат изведени пред судија на претходна постапка во Основниот суд Тетово.
Пронајдениот “канабис” и повеќе други предмети се фотодокументирани и подигнати за вештачење.
Дополнително од МВР информираат дека во заедничка акција со австриските полициски службеници во текот на месец мај во околината на Виена, откриени се три големи нелегални лаборатории за производство на дрога, при што се запленети над 2000 стебла марихуана.
Во акцијата лишени од слобода се три лица кои директно учествувале во одгледувањето и понатамошната продажба на наркотичната дрога, а се дел од поголема меѓународна организирана криминална група, која дејствува во повеќе држави во Европа.
Данијела Билбилоска