Ревизија на упадот во Собранието од 27 април, амнестија или само изјава за помирување со најголемата опозициска партија ВМРО-ДПМНЕ, се прашањата кои ги отвори изјавата на претседателот Стево Пендаровски дека осудените за насилото влегување во Собранието на 27 април не биле терористи, иако 16 од нив добија вкупно 188 години затвор, обвинети и осудени токму за терористичко загрозување на уставниот поредок. Освен политичка преквалификација на делото, Пендаровски смета дека со нови докази може да се бара повторно отворање на целиот случај.
Ваквите изјави од политичарите, вклучително и од претседателот на државата, од Хелсиншки комитет за човекови права, ги оценуваат како многу штетни, особено ако се тежнее кон независна судска власт.
„Не ја гледма причината да се дискутира околу квалификацијата на делото, бидејќи веќе таа пресуда е правосилна. Притоа мора да се потсетиме дека настаните од 27 април претставуваат колективна траума за нашето општество. Тоа што некои од учесниците од настаните од 27 април беа амнестирани не значи дека сега треба да ги амнестираме и другите кои што беа во оваа попстапка која е сега и правосилна. Напротив, сметам дека многу брзо судот треба да се заложи да се заврши постапката за организаторите за случувањата на 27 април“, е ставот на Уранија Пировска, извршна директорка на Хелсиншки комитете за човекови права.
Директорката на Хелсиншкиот комитет не сака да шпекулира дали изјавата на претседателот Пендаровски навестува некакви политички поместувања или нови процеси, со оглед дека ставот на Пендаровски за осудените од 27 април коинцидира со неодамнешните протестите на опозицијата за ослободување на осудените за 27 април како „уставобранители“, што беше и мотив за средба на Пендаровски со лидерот на ВМРО-ДПМНЕ, Христијан Мицкоски, најавена како помирување.
„Не можам да коментирам дали средбата на Пендаровски и Мицкоски има некаква врска и можеби навестува одредени политички случувања, но ќе повторам дека и претседателот и сите политичари и сите они кои што вршат одредена државна функција треба да се воздржуваат од изјави кои што можат да се толкуваат како притисок или мешање во одлучувањето на судовите“, вели Пировска.
Инаку Хелсиншки комитет за човекови права во 2017 го објави, а неодамна го реобјави извештајот за упадот во Собранието 27 април 2017 година во кој се наведуваат 5 основи за сторени 28 кривични дела.
„Едно од тие кривични дела е и терористичко загрозување на уставниот поредок“, вели Пировска.
Овие дела во Извештајотна Хелсинчки наведено е дека ги извршиле четири категории на лица и тоа организатори – кои го нарачале и пканирале делото, изврителите – оние кои насилно влегоа во Собранието и го помагале тоа, сите полициски службении кои не постапувале и не го спречиле упадот и четвртатат категорија се претпоставените полициски службеници по хиерархијата на Оперативниот штаб на МВР за кои постои сомнение дека издале незаконити или се откажале од издавање на законити и задолжителни наредби.
Тамара Грнчароска