Хамас синоќа прифати предлог договор за примирје во војната со Израел. Се однесува на три фази, со цел да се постигне траен прекин на огнот, пренесуваат дел од медиумските агенции, повикувајќи се на изјава на Халил ал Хаје, висок претставник на палестинската милитантна група.
Секоја од трите фази би траела по 42 дена и вклучува целосно повлекување на Израел од Газа, враќање на раселените лица и размена на заложници кои ги држи Хамас за палестински затвореници во израелските затвори.
Меѓувреме, како што се прошири веста за примирје, голем број на Палестинци почнаа со славење во делови на Газа, пренесува „Си-Ен-Ен“.
Веста дојде по само неколку часа по израелскиот повик до населението во источниот дел на градот Рафа „под итно да се евакуира“.
Во Рафа се наоѓаат 1,2 милиони палестински бегалци од другите делови на Појасот, а Израел упорно порачуваше дека подготвува напад на градот и покрај противењето на САД, како негов најважен сојузник.
Сепак израелски тенкови и сили влегоа во градот Рафа, на југот од Газа, а информацијата ја пренесоа палестински и египетски претставници.
Египетски функционер изјави дека се чини дека станува збор за операција од ограничен обем и дека израелските власти го информирале Египет дека војниците ќе се повлечат по завршувањето на операцијата.