Пред зградата на Работничкиот дом, каде е сместено седиштето на ССМ во Скопје денеска почна протестот на Сојузот на синдикати организиран по повод Меѓународниот ден на трудот.
Првомајскиот синдикален протест треба да заврши пред Влада каде синдикатите ќе ги испорачаат барањата до идниот владин состав, пораст на платите во приватниот и во јавниот сектор, минимална плата во износ од најмалку 450 евра во првите 100 дена од новата влада, исплата на трошоците за храна во висина од 20 проценти од просечната плата и исплата на трошоците за превоз.
Во своето обраќање пред присутните претседателот на ССМ Слободан Трендафилов порача дека работниците даваат црвен картон на Врховниот судот за неговата одлука да им биде одземен Работничкиот дом, појаснувајќи дека со тоа се направени обиди за притисок врз синдикатите.
-Денеска ние работниците се собравме пред Работничкиот дом, домот кој сакаат да го конфискуваат од нас за да го уништат синдикалното движење. Работничкиот дом пред кој повеќе од 70 години ги започнувавме сите протести, сите штрајкови и денеска го започнуваме големиот работнички протест. Ние работниците дадовме црвен картон на судот заради тоа што направи обид да изврши притисок врз синдикатите да ги уништи, дозволи функционерска чизма на вратот на работниците за да молчат, да бидат понизни, тоа што го направија денеска го гледаме на дело. Ние синдикатите, ние работниците, ние граѓаните, пензионерите сме сите тука денеска за да покажеме дека колку повеќе не напаќаат посилни не прават и колку повеќе пробуваат да ги уништат синдикатите ние се повеќе сме силни, порача Трендафиловски.
На денешниот протест нема да се приклучат 11 граѓански синдикати, меѓу нив СОНК, УПОЗ, Синдикатот за транспорт и врски и Синдикатот на станбено – деловни, комунални и водостопански организации. Од Конфедерацијата на слободни синдикати на Македонија рекоа дека ваквата нивна одлука е затоа што во моментов има техничка влада.