Во земјава во однос на почитување на правата на жените се бележи напредок, но сепак се уште не се рамноправни со мажите. Податоците објавени на официјалната Фејсбук страница на Државниот завод за статистика, кои се однесуваат на третото тримесечје од 2023 година говорат дека процентот на жени на раководни функции е помал во однос на мажите, а различно се вреднува и трудот меѓу нив за исто работно место.
Податоците содржани во публикацијата „Жените и мажите“ на Државниот завод за статистика покажуваат дека од вкупниот број работодавачи во 2021 година, само 19 проценти биле жени. Во вкупниот број на вработени лица од 15 до 64 години повеќе застапени се мажите со 56,2 проценти во споредба со жените 43,8 отсто. Жените се најзастапени во професиите како медицински сестри, шивачки, сметководители, наставнички, економисти, продавачки и правни застапници.