Ситуацијата на руско-украинската војна е статус-кво, со мала офанзива на Русите. Украинците се во дефанзива, но тоа не значи дека офанзивата на Русите ќе продолжи и понатаму, смета Мирче Адамчевски, колумнист на „Фактор“, во вечерашната дебата во „Топ тема“ на ТВ Телма.
„Мирот не е на повидок. Путин најави оти крајот на војната ќе биде во 2026 година. Зеленски најави дека Украина во моментот ќе се повлекува и ќе се подготвува за нова офанзива во 2025 година. Значи, до крајот на годинава може да очекуваме војна, а таа војна ќе продолжи и во 2025 година“, истакна Адамчевски.
Тој смета оти е многу тешко да се каже како ќе се развиваат работите во иднина.
„Оваа година е година на големи избори. Путин е, нормално, дека ќе ги добие изборите во Русија. Прашање е на процентот на поддршка, колку ќе биде над 80. Мошне интересно ќе биде во Америка, затоа што ќе има дуел мешу Бајден и најверојатно Трамп како што се развиваат работите. Евентуалното доаѓање на Трамп на власт, може многу да промени работите во Украина. Да не заборавиме дека ќе има избори и во Европа, каде полека се засилуваат десните сили и ќе има не само европски избори, туку во многу држави ќе има и парламентарни. И резултатите од тие избори можат да влијаат врз развојот на настаните во Украина“, истакна Адамчевски.
Перспективите не се розеви, заклучува Адамчевски. Војната ќе има со сигурност, вели тој, и додава дека никој не може да гарантира кога ќе дојде нејзиниот крај, иако, според него, крајот ќе биде на преговарачка маса.