Турскиот претседател Реџеп Таип Ердоган им врачи клучеви од новоизградените станови на граѓаните кои останаа без покрив над главата во разорниот земјотрес пред една година во провинцијата Хатај.
„Денеска во Хатај предаваме клучеви од станови на 7.275 корисници, од кои 6.572 се во нашите провинциски и окружни центри, а 703 се во руралните области“, рече Ердоган, јавија турските медиуми.
Тој потсети дека земјотресот на 6 февруари 2023 година предизвика големи разурнувања во 11 провинции, 124 окрузи, 7.000 села и населби, а катастрофата директно погоди 14 милиони граѓани.
На градежните работи моментно се ангажирани 110.450 работници на околу 930 градилишта во 11 градови погодени од земјотресот.
Според проценката на штетите во 11-те градови погодени од земјотресот, вкупно 850.000 единици, од кои 680.000 домови и 170.000 комерцијални објекти, биле сериозно оштетени и неупотребливи.
Штетата предизвикана од земјотресот беше проценета на 104 милијарди долари, додека повеќе од 53.000 луѓе загинаа.