Пет камиони со медицински материјал се натоварени и подготвено чекаат на границата меѓу Египет и Газа, објави Светската здравствена организација (СЗО), поздравувајќи ја најавата од Израел дека нема да го блокира влезот на конвојот со помош за цивилите на палестинската територија.
„Нашите камиони се натоварени и чекаат да тргнат“, изјави главниот директор на СЗО, Тедрос Гебрејесус.
Тој нагласи дека се надева оти залихите ќе бидат доставени што се отвори преминот Рафа, изразувајќи верување дека тоа ќе се случи утре.
Испораката на помош треба да биде прва по воведувањето на целосна блокада на Појасот Газа, во кој живеат 2,3 милиони луѓе, од Израел чии власти најавија и прекин во снабдувањето со електрична енергија, а се заканија и запирање на доставата на храна и гориво, како одговор на разорниот напад на Хамас на израелска територија на 7 октомври.
Од тогаш се случија силни израелски воздушни напади врз Појасот Газа, а Обединетите Нации предупредија на хуманитарна катастрофа.