Претседателот Стево Пендаровски ја предводи државната делегација на 78-та сесија на ГС во ОН. Во неговата делегација се неговата сопруга Елизабета Ѓоргиевска, вицепремиерот задолжен за економски прашања Фатмир Битиќи и министерот за надворешни работи, Бујар Османи. Дополнително, со претседателот на државата и неговата сопруга патуваат уште 10 луѓе – генерален секретар, советници, шеф на протокол, обезбедување…
Во истовреме, во Њујорк е и делегацијата која ја предводи премиерот, кој посетата ја користи за средба со економски лидери, и претставници на САД и ЕУ. Во неговата делегација е и вицепремиерот Бојан Маричиќ уште четворица луѓе од нивните кабинети.
При одењето на седниците на Генералното собрание на ОН се практикува системот на ротација – една година оди претседателот на државата, а една премиерот и имаат свое обраќање. Прв пат и двајцата највисоки функционери се во исто време и на исто место – во Њујорк.
Од тројцата претставници на државниот врв на Северна Македонија, во државата остана само претседателот на Собранието, Талат Џафери.