По големиот број случаи на труење и појава на дијареа по поплавите во Либија, во земјата започна вакцинација на населението, а во тек е дезинфекција на градот Дерна. Властите наредија вакцинација протв болести кои се појавуваат од загадена вода, за која се верува дека не е безбедна за пиење по страотните поплави. Најмалку 150 случаи на дијареа се пријавени за неколку часа во најпогодениот град Дерна, каде жителите се повикани да не ја пијат водата од водоводот, туку да пијат флаширана вода.
Либиската „Црвена полумесечина“ досега потврди за 11.300 смртни случаи, но застрашувачка е бројката на исчезнати, се проценува дека изнесува повеќе од 10.000, а уште 30.000 се раселени.
Во раните утрински часови на 11 септември, пукнаа две брани во планините над Дерна, а водата која се ослободи создаде 12 метарски воден ѕид кој го погоди градот и однесе цели населби во морето. Спасувачките тимови и натаму прекопуваат по калта и урнатите куќи и згради во потрага по преживеани. Главниот обвинител на Либија, пак, најави истрага за причините за уривањето на браните кои се изградени во 70-тите години од минатиот век.