Освен РКМ, кој купувал и продавал од опасното тешко масло на САНС АГ од Штип, од истиот погон купувале и набавувале уште две компании – „Тритерол Петрол“ и „Екопор“. САНС АГ, иако немал лиценца за производство, од искористени гуми и друг отпад со горење произведувал тешко масло кое било користено како мазут низ Македонија. Од него купувал РКМ на Ратко Капушевски и Ерџан Сулкоски и со фиктивни фактури, со допишување, опасното гориво го продавале во ФЕНИ во Кавадарци, за што, како што веќе извести Телма, финансиската полиција е известена и отвори истрага. Но, според потврдени информации, во овој бизнис со продажба на опасно по здравје, штипско произведено масло за горење, учествувале уште две фирми. И двете се од Скопје.
Инспекторите утврдиле дека „Тритерол Петрол“ набавувал вакво опасно масло за горење за внатрешна трговија. Фирмата „Тритерол“ порано имаше седиште во Струмица, а сопственоста беше на донатор на СДСМ и близок пријател со Заев. Од 2019-та, фирмата е префрлена во Скопје, а нејзин сопственик е Љупчо Пецов, кој беше осуден во аферата Керозин за малверзации во трговија со мазут.
Втората фирма која е откриена од државните инспектори како купувач на опасното масло за горење е „Екопор“ Скопје која што има погон во ОХИС во Пинтија. И двете фирми се опфатени со нови надзорни акции на надлежните инспекторати, пазарниот и оној за заштита на животна средина. Двете фирми не се пријавени во финансиската полиција, бидејќи за разлика од РКМ, не се пронајдени лажни фактури со допишување на зборот мазут.
Од финансиската полиција за Телма, одговорија дека случајот за РКМ го работат и прибираат документи и искази.
Лани напролет војници на АРМ од полигонот на Криволак се пожалиле на здравствени проблеми, по што државниот инспекторат за животна средина откри неправилности дека маслото создадено во САНС АГ е ризично со сомнежи дека е канцерогено. Фирмата РКМ, во сопственост на Капушевски и Сулкоски; и сега е под истрага; беше избрана на сите јавни огласи на ЕСМ за набавка на мазут за ТЕЦ Неготино. Производителот на опасниот мазут САНС АГ завчера беше казнет од Државниот инспекторат за животна средина поради тоа што не го почитувале и не го спроведувале решението на инспкеторите.
Миомир Серафиновиќ