Министерот за надворешни работи, Бујар Османи вечерва реагираше на изјавата на министерот за одбрана на Србија и претседател на Српската напредна партија (СНС), Милош Вучевиќ дека Црна Гора и Северна Македонија ја навредија Србија со признавањето на независноста на Косово.
-Направивте грешка и ќе ви се удри од глава, како што во Украина им се удира во глава на сите кои го промовираа Косово и Метохија како независна држава. Ја отворивте Пандорината кутија. Смешни се вашите бирократски одговори дека Косово е sui generis, дека е посебен случај. Ниту Албин Курти, ниту Тирана не ви веруваат во тоа, изјави Вучевиќ.
По оваа изјава со реакција се јави македонскиот министер за надворешни работи Бујар Османи. Тој на својот Фејсбук профил порача дека Северна Македонија го отфрла мешањето и несоодветните забелешки од функционерите од соседството.
-Се залагаме за регионална стабилност и соработка, вклучително и со Р. Србија и Р. Косово. Очекуваме појаснување од министерот за одбрана на Србија, напиша Османи на Фејсбук.
Вучевиќ не застана и продолжи
-Поддршката на Србија за територијалниот интегритет на сите земји-членки на ОН е безусловна. Сепак, не можеме да пофалиме ничие непочитување на нашиот сопствен територијален интегритет. Неодамнешните настани ги потврдија нашите предупредувања дека Унилатералната декларација на независност на Косово (sui generis) не е уникатен случај и дека ќе им се врати порано или подоцна. Никој во Србија не ликува за тоа, само ги посочуваме фактите, напиша Вучевиќ алудирајќи на настаните во Тетово при посетата на косовскиот премиер Албин Курти.
Од Атина со заедничка фотографија со српскиот претседател Вучиќ и дипломатско разблажување на пораките од едниот северен сосед за односот на Македонија со другиот северен сосед се јави премиерот Димитар Ковачевски.
-Вечерва разговаравме со српскиот претседател Вучиќ во Атина. Ме увери дека како преставник на српската држава, тој ги смета македонскиот народ и македонската држава за исклучително пријателски и дека доколку некој македонски граѓанин е навреден од било која порака од српската држава, тој лично ќе се извини, напиша Ковачевски на Фејсбук.