И тетовските пензионери најавија присуство на заедничкиот протест на пензионери од повеќе градови, кој треба да се одржи во понеделник во Скопје, со кој се бара линеарно покачување на пензиите.
Групата која и денеска се собра пред Здружението во Тетово уште еднаш го искажаа револтот од ниските пензии, па започнаа да собираат и потписи за поддршка на барањата и од други пензионери, кои поради здравствени причини не можат да присуствуваат на протести.
И ние исто сме им од тука од Тетово голема поддршка, во понеделник се оди во Скопје. Имаме доволно потписи, без разлика на националност, од Тетово кои даваат поддршка за покачување на малите пензии, зашто овој живот е многу тежок живот. Не се преживува со 12 илјади. Како што ќе биде минималната плата, да биде и минималната пензија, вели Летка Мишовска, пензионерка од Тетово
Редно беше да се слушне и гласот на пензионерите. Бараме, како и сите пензионери, линеарно покачување на пензии, потоа бараме на позитивна листа да се стават лекови кои досега ги немало, а пензионерите не се во можност да ги набават, поради високите цени, изјава Дивна Зафировска, пензионерка од Тетово.