Разузнувачката служба на Полска објави дека уапсила 18-годишно момче кое е осомничено како исламистички бомбаш самоубиец и на тој начин спречила планиран терористички напад чија цел била зградата на владата во Варшава. Тинејџерот, кој е полски државјанин кој лани го прифатил исламот, бил приведен на 16 април.
За време на претресот во неговиот стан биле пронајдени докази за планот на нападот и материјали за изработка на експлозивен појас. Момчето било во контакт со лица кои тврделе дека се претставници на Исламска држава.
Тинејџерот е обвинет за учество во активности на организирана криминална група чија цел била терористички напад. Тој се товари и дека планирал да изврши дело кое е опасно по живот и здравје на повеќе луѓе и по предлог на обвинителството, судот наложи мерка притвор во траење од три месеци. Според полската новинска агенција ПАП, тој се соочува со затворска казна до 10 години.