Иницијативата за уставни измени сè уште не излегла од „Илинденска“ број 2. И покрај најавите од Правда, Владата ја помести оваа точка за некоја од наредните седници. Чекајќи ја процедурата, ВМРО-ДПМНЕ и СДСМ продолжуваат со различни толкувања на разговорот Ковачевски-Мицкоски од 7 јуни.
ВМРО-ДПМНЕ самоуверено повика да почне собраниската постапка, потенцирајќи дека ниту еден од нејзините 44-ца пратеници, нема да гласа за менување на Уставот „под бугарски диктат“.
Премиерот Ковачевски изрази подготвеност да го исполни барањето на ВМРО-ДПМНЕ да влезе во Владата, а ДУИ да излезе. Избори најавува по отварањето на две поглавја од пристапните преговори, откако слушнал од Мицкоски дека нема проблем да се гласаат уставните измени.
Иницијативата за менување на Уставот со внесување на Бугарите и неколку други делови од народи е изготвена од Работната група пред точно еден месец. Оттогаш се чека да ја помине Владината процедура, по што треба да биде испратена во Собрание. Менувањето на Уставот може да биде завршено за 4 месеци, но за да почне, мора да добие виза од најмалку 80 пратеници.
Соња Николовски