Претседателот Стево Пендаровски нема да ја коментира вчерашната лидерска средба ниту решенијата за уставни измени кои на маса ги ставија лидерите на двете најголеми политички партии Димитар Ковачевски и Христијан Мицкоски.
Од неговиот кабинет со став за Фокус претседателот ќе го чека крајниот исход. Вчерашната лидерска средба која траеше околу 2 ласа не вроди со договор.
Предлогот кој на маса бил ставен од СДСМ бил сите заедно да ја изгласаат потребата за донесувањето на уставните измени и веднаш потоа ВМРО-ДПМНЕ да влезе во Владата во која ќе добие пет од ресорите кои сега ги има СДСМ.
Таа влада во која ќе бидат сите политички партии кои се за евроинтеграциите ќе ги донесе уставните измени, ќе го заврши скрининг процесот и ќе ги отвори поглавјата од преговорите со ЕУ, при што може и да затвори едно или две од поглавјата од првиот кластер. Потоа, истата таа Влада ќе ги организира следните избори.
Ставот на ВМРО-ДПМНЕ е дека се подготвени да влезат во Влада со СДСМ и останатите партии, но без учество на ДУИ.
Освен овој услов, што ДУИ експресно го прифати, Мицкоски бара уставните измени да стапат на сила од денот кога ќе почне ратификацијата на пристапниот протокол на Македонија во рамките на ЕУ од парламентите на 27 членки. Исто така, услов на ВМРО-ДПМНЕ е и ЕУ да донесе Декларација со која ќе нагласи дека го признава посебниот македонски идентитет, јазик, култура, обичаи и традиции.