Речиси на секој чекор во главниот град можат да се најдат овие сини тротинети. Ги има околу 500 на број, а служат како превозно средство за брзо и ефикасно пробивање низ градскиот метеж. Стигнаа од Турција, а некои од нив не издржаа ни една недела во главниот град откако се соочија со нашиот примитивен менталитет.
Искршени,фрлени во контејнери,украдени се само дел од фотографиите на овие сини уреди кои требаше да бидат декор на Скопје. Свеста и лошите патишта се само дел од проблемите поради кои граѓаните се скептични дека оваа идеја би траела подолго.
„Јас не верував уште од самиот почеток дека би функционирале воопшто тука, затоа што овој народ нема свест за таква работа“, вели граѓанка.
„Веројатно некои улици се поадекватни за нив, некои не исто како и за велосипеди. Така што и да и не“, вели друг граѓанин.
„Па искрено идејата е одлична, пред се во сите светски и европски градови тоа постои. Кај нас мислам дека не е регулиран сообраќајот за да се користат воопшто. Нашата свест е дека треба да се оштети се што е јавно, така да не верувам дека би успеала“, вели граѓанка.
Дел од граѓаните на социјалните мрежи се жалат дека софтверот за наплата не функционира и дека од сметките им се извлечени големи суми на пари… Операторот за онлајн поддршка велат комуницира само на англиски и на турски јазик па оттука решавањето на проблемите оди тешко додека сметката расте. Менаџерот на компанијата БинБин за Телма уверува дека проблемот е решен и дека средствата ќе им бидат вратени, и апелира на поразумно користење, но и грижа за сините тротинети.
„Со тие корисници веќе стапив јас лично во контакт и беа позитивно настроени дека на нив средствата веќе им се вратени, но во моментот биле во паника па мислеле дека тоа нема да се стопира, но веднаш од компанијата им е стопирано и вратени им се сите средства до тој момент кога е одлогирано“, вели за Телма Висар Дурак менаџер на Бинбин.
Тарифата за изнајмување на електричен тротинет изнесува 9 денари за минута без данок, а се користи преку апликација на мобилниот телефон.
Симона Петровска