Поради неисполнети барања, упатени до централната и локалната власт, Коалицијата „Менуваме“, која се бори за правата на лицата со попреченост најави голем протест во Скопје на 7 јуни. Не се задоволни од добиениот додаток за попреченост од 14,9% во услови на инфлација. Велат, со тие пари не се покрива ни еден трошок. Гневни се и на ветувањето на министерката за труд дека паричната помош од 3.000 денари за енергетската криза ќе ја добиваат до крајот на јуни, но им била запрена со исплатата за март. До централната власт испорачаа барања во стилот на зголемените плати на функционерите до 78%.
„Додатокот за попреченост како за возрасни, така и за деца да се покачи за 78%. Бараме 78% покриеност со образовни асистенти во сите образовни установи, наменети за деца со попреченост. Потоа бараме досегашното користење на асистенти од 80 часа месечно да се зголеми на 160 часа, бидејќи 80 часа не ги задоволуваат потребите“, изјави Суарет Алишан од Коалиција „Менуваме“.
Од Коалицијата бараат трошоците за ортопедски помагала да ги покрива Фондот за здравство, да се формираат велнес центри за рехабилитација на лицата со попреченост, а надлежноста за нив од Министерството за труд да ја превземе Министерството за здравство. Имаат барања и кон локалната власт.
„Бараме пристапен јавен превоз. Бараме пешачки патеки за лица со попреченост и бараме сите семафори да бидат говорно опремени за сите лица со попречен вид“, истакна Алишан.
Од Министерството за труд и социјална политика велат дека се отворени за конструктивни дискусии и дека ќе продолжат со социјалните парични права и нивно усогласување со трошоците за живот. А, паралелно ќе развиваат социјални услуги, согласно потребите на корисниците. А, од Град Скопје велат дека за говорните семафори, од коалицијата треба да достават барање со предлог локации за поставување, што ќе биде разгледано.
Доколку не се реши проблемот со јавниот превоз, од коалицијата најавија кривични пријави до градоначалничката Арсовска и до ЈСП. Барањата до централната и локалната власт ги испратиле до Уставниот суд и очекуваат од таму да се изјаснат за нив.
Сотир Трајков