Итно решение за проблемот со државна матура, бараат од Сојузот на средношколци кои апелираат, Министерството за финансии да ги прифати барањата на вработените во Државниот испитен центар. Така штрајкот ќе сопре и побрзо ќе се организира државната матура со мало одложување.
-Да се одложи само првиот екстерен испит кој е закажан за 27-ми мај. На начин на којшто ќе овозможи вработените од Државниот испитен центар да имаат доволно време да ги прегледаат тестовите и да ги објават резултатите, вели Лука Павиќевиќ, претседател на Сојузот на средношколци.
Велат дека навремените резултати им се неопходни на сите матуранти, а особено на оние кои сакаат да студираат во странство.
-Имајќи предвид дека околу 12% од матурантите секоја година се запишуваат на студии во странство, а пак тие универзитети бараат резултати од матурските испити најдоцна до средината на јули, додаде Павиќевиќ.
Вработените во Државниот испитен центар нема да се откажат од штрајкот додека не добијат согласност за покачување на платите од Министерството за финансии. Доколку се исполни нивното барања ќе вложат максимум за државната матура да биде што побрзо организирана.
-Најавена е средба за утре со претставници од Владата. Се обидуваме да дојдеме до позитивен исход и што побрзо да продолжиме со работа, вели Емилија Бошковска, претседател на Синдикалната организација при Државен испитен центар.
Штрајкот на вработените во Државниот испитен центар поради израмнување на платите со минималната, почна на 24-ти април, речиси месец дена пред првиот испит од матурата кој средношколците треба да го полагаат.
Тамара Марковска