Претседателот на ДУИ Али Ахмети и неговиот близок партиски соработник и вицепремиер Артан Груби го користат Министерството за политички систем за средби со сопартијци и со странски посетители. Ова е спротивно на Етичкиот кодекс на Владата и одредбата дека „министри не смеат да ја користат функцијата за лична корист или за корист на блиски лица и политички партии“, укажува Антикорупциската комисија. Фотографиите со кои располага ќе ги испрати кај министерката за добро владеење Славица Грковска.
Министерот Артан Груби е зачуден од ваквото прашање. Се пошегува дека можеби Антикорупциската комисија сѐ уште реагира што во просториите што ѝ беа ветени, се смести Министерството за политички систем, а Комисијата се всели во зградата од спротива.
Освен за административни и партиски активности, просториите на Министерството за политички систем се користат и за анти-стрес терапија. Такво објаснување даде вицепремиерот пред неколку месеци, објавувајќи како тој и неговите колеги – министри од ДУИ играат кошарка и фудбал на мали голчиња на скапиот паркет, меѓу канцеларискиот мебел, уметничките слики и другите експонати во неговиот кабинет.
Соња Николовска