Изолацијата и осаменоста во време на пандемијата го променија однесувањето на многумина. Анализите говорат дека по ковид пандемијата, остана тивка епидемија на нарушено ментално здравје, особено кај децата и младите.
Проблемот е глобален. Над една милијарда луѓе во Светот се соочуваат со вакви проблеми.
Многу деца и млади кои имаат психички проблеми се срамат да побараат стручна помош и најчесто тоа се обидуваат да го решат низ разговор со семејството и пријателите. Надлежните сметаат дека треба отворено да се поразговара за проблемот за да се подобри ситуацијата.
-Овој проблем не е површински туку е многу подлабок. Дали ние правиме доволно? Воопшто не правиме. Сите треба да почнеме од самите себе и да направиме повеќе во оваа насока, вели Фатмир Меџити, министер за здравство.
Универзитетска клиника за психијатрија – Скопје со помош на УНИЦЕФ и УСАИД изработи студија за „Менталното здравје на адолесцентите и нивните старатели за време на пандемијата Ковид-19“. Според нивните резултати едно од седум деца имаат проблеми со менталната здравствена ситуација, а кај голем дел од возрасните проблемите тлееле уште од детството.
-Повеќе од половина од испитаниците кои идентификуваа дека имаат потреба од услуги за ментално здравје не побарале такви услуги. Преку оваа студија знаеме дека 42% од испитаниците пријавиле умерени до тешки симптоми на вознемиреност, а 25% изјавиле дека имале намери на самоубиство, вели Артур Ајвазов, заменик претставник на УНИЦЕФ.
Поддршката од семејството и пријателите е клучна за справување со одредено ментално нарушување, но неизбежна е и стручната помош.
Тамара Марковска