„Една изборна единица„ за која начелно се залагаат сите партии, освен ДУИ, не е во приоритетите на новата работна група што ќе го реформира изборното законодавство. Првин ќе се вметнуваат препораките на ОБСЕ –ОДИХР во постоечкиот Изборен законик, а потоа ќе се разговара за нов.
Промената на изборниот модел е приоритет за помалите политички партии, но големите само декларативно ја поддржуваат. Вчера и од СДСМ и од ВМРО-ДПМНЕ повторија дека се „за„ оваа идеја, но социјалдемократите инсистираат на консензус, а од опозицијата бараат првин владејачките партии да се договорат меѓу себе, по што и тие ќе дадат поддршка. Но, партиите од албанскиот блок се против. Од Алијанса бараат осум, наместо една или шест изборни единици, а ДУИ бараат да останат постоечките шест. Доколку останатите се договорат за една единица, имаат и други услови.
Новиот претседател на работната група не зборуваше за ова прашање, но е оптимист дека за делот за кој имаат консензус, а тоа се забелешките на ОДИХР, ќе се запазат роковите.
Во работната група учествуваат и претставници од три министерства, неколку институции, невладини организации и здруженија. Од владејачките партии свои членови имаат: СДСМ, ДУИ и Алијанса за Албанците. Од опозицијата, пак, претставници имаат: Беса, Алтернатива, Левица и Демократскиот сојуз. ВМРО-ДПМНЕ не испратија претставник.
Далиборка Демјанска Цветановска