Министерот за информатичко општество и администрација Азир Алиу не е за забрана на социјалната мрежа ТикТок поради инцидентот кога лекар-анестезиолог на тетовска Гинекологија во живо објавуваше лекарски интервенции, прегледи и пациенти од болницата. Решенијата не треба да се носат врз поединечни случаи на злоупотреби туку да се прави обука на граѓаните, реле Алиу.
-Ова е предизвик за сите земји, а не само за нас. Тоа се дневни процеси во кои што за жал ако немаме добро обучено или информирано население за социјалните мрежи или „футпринт“ или дигитални отпечатоци во кои што ние ги оставаме во социјалните мрежи, ќе се случуваат и вакви настани. За жал, мислам дека е несериозно врз основа на еден случај дневно ако имаме такви злоупотреби, да се забранат социјалните мрежи. Но, исто така мислам дека е многу сериозно како држава да ги анализираме сите процеси и да видиме како се движи и кој тип на информации ќе треба на нашите граѓани да им ги сервираме, да ги информираме со цел да бидат свесни за начинот како се употребуваат и на кој начин. За жал, тие социјални мрежи се многу лесни за употреба, но од другата страна ако не сте доволно информирани можат да настанат вакви злоупотреби, одговори министерот Азир Алиу.
Во многу западни земји низ светот ТикТок, познатата и брзорастечката социјална мрежа креирана во Кина е забранета поради сериозни сомнежи за слабости во информатичката безбедност и можно прибирање на податоци од корисниците на мрежата. Такви забрани има во САД, Велика Британија, Холандија, во некои институции на ЕУ, и покрај негирањето на Кина дека го злоупотребува овој начин за нелегално прибирање на информации.
ТикТок анестезиологот од Тетово без лиценца за работа – етичката комисија утврди повеќе прекршоци