Земјоделците ќе останат со куси ракави и демотивирани, реагираат производителите од струмичко на одлуката за ограничување на цените на земјоделските култури. Министерот Николовски, пак, смета дека ограничувањето само ќе ја запре незаситноста на трговците, а не и профитот на градинарите.
Ограничувањето на цените на доматите, краставиците и пиперките во период кога треба да стаса домашното производство е проблем за струмичките земјоделци. Велат дека први ќе се берат културите произведени во контролирани услови, што е прилично скап процес, па оваа одлука може да ги остави без профит.
Но, министерот за земјоделство вели дека анализите им се детални и нема со ограничувањето да трпат производителите и купувачите, туку само трговците.
Цените на овие земјоделски култури се ограничени од вчера, а државниот пазарен инспекторат најавува строги контроли по маркетите и пазарите. Домашното производство, пак, треба да стаса за околу две седмици.
Сузана Мицева