Интересот на јавноста во последно време опадна за работата на комисијата. Соопштение немаше, не затоа што ние не сакавме да дадеме, но навистина немаше интерес ниту од медиумите, ниту од јавноста, изјави академик Драги Горѓиев, копретседател на македонското-бугарската комисија, во вечерашното интервју во „Топ тема“ на Телма ТВ, како образложение за „тивкото“ одржување на последниот состанок на комисијата во минатата недела во Скопје.
„Во крајна линија, за нас е подобро да работиме во една помирна атмосфера, без преголем фокус на јавноста врз работата на комисијата. И не само оваа, туку и претходните средби во Софија и во Скопје, минаа со многу мал интерес на јавноста. Не е толку до немањето желба кај комисијата да нема општење со јавноста, повеќе јавноста и медиумите не се интересираат за работата на комисијата и очигледно имаат други теми кои се погорливи од нашата работа“, истакна Горѓиев.