Остана нерешен проблемот на тричленото семејството Крстевски кои се лица со посебни потреби. Нивниот живот продолжи во катастрофални хигиенски услови и по добиено ветување дека станот ќе биде исчистен. Поминаа речиси три недели откако телевизија Телма ја објави сторијата, но чекори од институциите се преземаа само додека го објавувавме проблемот со кој се соочува семејството, потоа следуваше молк.
-Сè уште не е мрднато од мртва точка. Како одминува времето се повеќе се натоложуваат проблемите. Никола, кој е со скршена рака деновиве треба да оди да го извади гипсот во болница, но тој не може да се симне од горе од неговиот стан, вели Миле Робев, сосед на семејството.
Министерката тренчевска вели дека веднаш по објавувањето на сторијата во медиумите е пратена екипа во домот на семејството за да направат увид. Утвриле дека семејството е со психички проблеми, живееат во лоши хигиенски услови и се приматели на одредени права. Тие во кординација со центарот за социјални работи ќе преземат чекори за случајот, но ова е мултисекторски проблем нагласи Тренчевска.
Ова е проблем на социјалните и здравствените служби. Тоа што можеме ние да го направиме е дезинфекција на станот, а понатаму доколку добиеме согласност од семејството може да ги сместиме во некоја институција, вели Јована Тренчевска, министерка за труд и социјална полтика.
Со зголемување на температурите непријатната миризба од станот на Крстевски ќе се рашири низ целата зграда, велат соседите. Проблемот трае со години, соседите се во исчекување, молат еднаш засекогаш тој да биде решен.
Тамара Марковска