Портпаролот на ВМРО-ДПМНЕ, Наум Стоилковски сними политичка гатанка на улицата „Македонија“, во центарот на Скопје, а откако ја кажа беше вметнат и одговорот кој гласеше Груби.
Во позадина на Стоилковски, како што стои во описот на локација на видеото, е најновиот дуќан на братот на првиот вицепремиер во владата, Артан Груби.
„Ниту ден тој не губи, од крадење се уби, парите баш ги љуби и се вика …..“, гласеше гатанката што ја кажа Стоилковски.
Опозициската партија во изминатите денови упати обвинување за нелегални активности до првиот вицепремиер. Од таму, меѓу другото, јавно прашаа како неговиот брат купил дуќан од половина милион евра, во услови кога неговата фирма работи со загуба во изминатите четири години.
Груби ги отфрли обвинувањата и негираше поврзаност со бизнисот на брат му. На ВМРО-ДПМНЕ му возврати оти очекувал клевети, но не и атак врз членови од неговото семејство.